RINGTU RINNA SOREN KIERKEGAARD-A TARMIT
AȚANGA THLIRIN
— Hmingremhlua Sailo
Soren Kierkegaard-a hi kum zabi-19 hunlaia Philosopher (finna ngaina mi/thil bul chhui mi) lar tak pakhat niin, a philosophy (thil bul chhuina) hi ringtu mimal rinna, ringtu leh Pathian inkar, ringtu inpeknaah te a innghat a. Chuvangin a philosophy tlem azawng han thai lang ve ila.
Thudik tehna chi hnih: Kierkegaard-a hian mihringte hian ‘thu dik’ kan tih hi chi hnih awmin a sawi a. A pakhatna chu ‘logical truth/objective truth,’ tiin ‘thu dik awm sa’ tih paw’n kan let thei awm e. Hei hi science leh mathematics thiamna hmanga chhut chhuah theih, pawn lam thila (external factor) innghat, mi zawng zawnga danglam ngai lo a ni. Enitrna’n 1+1=2, lei hip nat zawng te, antibiotics thawh dan te hi an ni. Hengte hi ‘facts’ tih te paw’n a sawi theih ang.
Thu dik pahnihna erawh hi chu a mihring chhungril (internal factor)-a innghat, ‘personal truth/subjective truth,’ tiin ‘mahni aṭanga chhuak thu dik/mimal thu dik’ tihin kan let thei awm e. Hei erawh hi chu mihringin ni tina kan thil tawn (personal experience) aṭanga kan neih te, a mihringa innghahna chen nei, a mihring a zira danglam thei a ni. Entirna’n: rinna te, nun awmzia nia kan rin te, tui leh mawi tih zawng te thleng hian a ni thei awm e.
Kierkegaard-a chuan hringnunah hian logical truth ai hian subjective truth hi a pawimawh zawk niin a sawi bawk a. A chhan chu ni tina min kaihruaitu zawk niin a ngai; chu mai bakah chuan tisa leh thlarau inkungkaihna hrethiam tur te, finna (wisdom) nei tur te hian subjective truth hi a pawimawh hle niin a ngai.
Ni tina duhthlanna kan siamnaah hian lawmna, lungawina, thawhrimna, phurna leh chhelna te pawh hi subjective truth aṭang veka kan neih a ni ti ila kan sawi sual awm lo e. Mi tam zawk hian vawksa ṭhat lohzia pawh kan hria (objective truth); mahse, a tui kan tihna (subjective truth) vangin kan ei lo thei chuang lo a. Taksa sawizawi ṭhatzia pawh hrilh nawn kan ngai lo (objective truth); mahse, taksa sawizawi tur chuan peih loh chung pawhin tih ṭang ṭang (subjective truth) a ngai. Zuk leh hmuam ṭhat lohzia pawh kan hre vek (objective truth); mahse, insum theihnate, nghei theihnate hi chu mimal chungril-ah (subjective truth) kan tlachham ṭhin. Chuvangin Kierkegaard-a’n hringnun kaihruaitu tak tak atan subjective truth/mimal thu dik hi a pawimawh zawk a tih hi a pawmawm viau.
Ringtu Rinna chu Subjective truth/Mimal thudik: Kierkegaard-a hian ‘Ringtu rinna’ emaw ‘Ringtu nun’ ngei pawh hi subjective truth niin a ngai a. A chhan chu Pathian leh mimal inkar hi a dang ṭheuh niin a ngai a. Pakhat leh pakhat belh pahnih hi mi zawng zawngah a dang ngailo. Kan Bible (scripture) leh thurin (doctrine) pawh hi tam zawkah a in ang ṭhin. Tin, Bible aṭang kan hmuh danin Pathian hmangaihna pawh mi zawng zawng chungah chuan angkhat vek ani. Nimahsela, Pathian hmangaihna leh khawngaihna kan hriathiam dan leh hriatfiah dan chu a in an loh mai bakah va hrethiam tak tak tur chuan va tawnhriat a ngai phawt ṭhin. Chuvangin, ringtu mimal rinna pawh hi ‘subjective truth/mimal thudik’ atih pawh hi a pawmawm viau.
Tin, objective truth kan tih theih lohna chhan pakhat chu Pathian kan rin chhan hi science hmanga chhut chhuah chi a ni lo a, mathematics hmanga chawh chhuah theih a ni hek lo. Pathianin kan mimal nun ṭheuhah hna a thawk a, chumi a thawh rah chu thlarau thianghlim kal tlangin miin a lo hrethiam ṭhin. Chuvangin Pathian kan rin chhan dik tak chu kan thurin vang emaw science thiamna vang emaw a ni lo a. Pathianin kan mimal nunah ṭheuh hna a thawh vang a ni ti ila kan sawi sual tam lo ang.
Rom 10:9-ah “I kâin Isua chu Lalpa a ni tih i mana, mitthi zîng ata Pathianin a kai tho tih i thinlunga i rin (objective truth) chuan, chhandam i ni ang. Thinlunga ring (subjective truth) chu thiam chantîr an ni a, kâa ṭan chu chhandam an ni bawk a,” tih a ni. Bible aṭanga kan hmuh danah hi chuan Rom 10:9-ah hian ringtu rinna hi objective truth leh subjective truth angin a sawi kawp tih pawn a sawi theih awm e. Nang ringtu, Pathian leh i mimal inkar hi engah nge a inngah ve le?
